Santiago de Compostela é coñecida internacionalmente por ser o destino final dunha ruta milenaria de peregrinación, o Camiño de Santiago, que culmina coa chegada á catedral. Pero a cidade compostelá ten moito máis que ofrecer a todas aquelas persoas dispostas a marabillarse coa súa cultura, natureza e arte. Séculos de historia respíranse en cada rúa e en cada pedra desta cidade declarada Patrimonio da Humanidade pola UNESCO.
A Catedral de Santiago: un imprescindible
A alma da cidade. Impoñente. Emocionante. Inesquecible. A Catedral de Santiago non é só un monumento, é un símbolo de chegada e, ao mesmo tempo, un punto de partida. A súa fachada barroca deixarate sen alento, case como aos peregrinos que chegan á Praza do Obradoiro tras un longo camiño. Non esquezas entrar para admirar o Pórtico da Gloria, unha xoia da arte románica.
Tamén podes subir aos tellados para gozar dunha das mellores vistas panorámicas da cidade… e, se podes, non perdas o mítico botafumeiro en acción voando polo cruceiro da Catedral. Ademais, se vas ao solpor e o tempo acompaña, gozarás dunha Catedral que pide a berros unha foto para o Instagram. E pola noite… busca a sombra do peregrino (pista: está na Praza da Quintana).
Reserva unha visita guiada
Nunha estancia exprés en Santiago sempre pode resultar útil facer unha visita guiada. Diferentes axencias de viaxes e guías turísticos locais ofrecen os seus mellores percorridos por Santiago e arredores. Aquí atoparás múltiples opcións segundo os teus intereses, moitas delas de balde.
Guías locais
Tamén podes dirixirte directamente ao provedor do servizo que che interese. Recomendámosche escoller guías turísticos locais. Aquí tes unha listaxe.
Museo das Peregrinacións de Santiago: o Camiño contado dende dentro
Se che interesa afondar no Camiño de Santiago non podes perder este museo que explica a súa orixe, simbolismo e impacto. Desde reliquias medievais ata mapas antigos, pasando por pezas de arte relixiosa, este museo é unha parada obrigatoria se queres comprender por que millóns de persoas cruzan medio mundo para chegar aquí.
Centro Galego de Arte Contemporánea
Non todo é pasado en Compostela. O CGAC é o contrapunto perfecto. Nun edificio branco, limpo, xeométrico, deseñado polo mestre Álvaro Siza, expónse o máis actual da arte galega e internacional. É un espazo de difusión cultural onde as súas exposicións invitan a pensar, cuestionar e sentir. Tamén conta cunha biblioteca de arte contemporánea, unha libraría especializada e unha cafetería.
Museo do Pobo Galego
Sabes como pescaban os galegos hai cen anos? Ou como era a vestimenta tradicional? Este museo non é só unha colección etnográfica, é unha declaración de amor ás raíces galegas. Situado no Convento de Santo Domingo de Bonaval (que acolle tamén o Panteón de Galegos Ilustres, onde repousan os restos de Rosalía de Castro ou Castelao), lévate por salas dedicadas á música, ao mar, á agricultura, aos oficios tradicionais e mesmo ás crenzas populares.
Imposible non mencionar a súa tripla escaleira helicoidal, única no mundo, con tres ramplas que soben xuntas sen cruzarse nunca. Tan simbólica como hipnótica, é unha parada imprescindible para presumir nas redes sociais.
Casa da Troia: a pensión que fixo historia
Sabías que unha humilde pensión de estudantes se converteu nun símbolo literario de toda unha época? A Casa da Troia recrea a vida estudantil de finais do século XIX, inspirada na novela de Alejandro Pérez Lugín.
Todo está presentado fiel á época: dormitorios, mobiliario, obxectos persoais, mesmo libros con anotacións manuscritas. Visitala é como colarse na Compostela bohemia, rebelde e universitaria de hai máis dun século. Ideal para quen ama a nostalxia, as historias escondidas… e os cafés con tertulia.
Parque da Alameda: a postal perfecta
A poucos pasos do casco histórico, o Parque da Alameda é un auténtico respiro verde. Aquí atoparás esculturas curiosas como as famosas "Dúas Marías" ou a de Valle-Inclán, camiños entre camelias, a árbore dos namorados e unha vista privilexiada da Catedral no Paseo da Ferradura. Ideal para camiñar ou simplemente sentarse a contemplar a vida santiaguesa pasar.
Parque de San Domingos de Bonaval: verde que che quero verde
Un antigo cemiterio reconvertido nun parque de 39.963 metros cadrados, divididos en tres alturas nas que perderse paseando ou gozando das vistas que ofrece do casco antigo de Santiago. Está xunto ao Museo do Pobo Galego e ao Centro Galego de Arte Contemporánea (CGAC). Ideal para ler, tombarse ao sol, ver como os picheleiros fan picnic ou contemplar o solpor sobre as torres da Catedral.
Se che gusta camiñar, Santiago tamén ten sorpresas naturais agardando fóra do centro.
Ruta do Río Sarela
Sendeiro fluvial que acompaña ao río Sarela polos seus pequenos saltos e rápidos, con pontes de pedra e antigos muíños para un paseo de conto. É unha opción perfecta para camiñar relaxadamente rodeado de vexetación autóctona e desconectar da cidade.
Se che gusta camiñar, aquí tes unha proposta de rutas de todo tipo para coñecer a cidade: a imprescindible, a inusual, a verde, a mística, a recomendada para fotógrafos…
Monte Pedroso
O miradoiro natural de Santiago por excelencia. Verás unha panorámica de Santiago e da paisaxe rural que rodea a cidade co silencio e os sons da natureza como banda sonora. Conta con varias rutas de sendeirismo e a subida ten unha dificultade moderada. Iso si, as vistas compensan o esforzo.
Se buscas natureza e un pouco de aventura, Santiago está rodeada de sorprendentes sendeiros. Busca a paisaxe e o nivel de dificultade que mellor se adapte a ti.
Se ves en familia, estas opcións non fallan.
Museo da Maxia Kiko Pastur
No corazón do casco histórico de Santiago, ofrece visitas guiadas con ilusións ópticas, pezas históricas e maxia en directo. Un espazo interactivo para todos os públicos con tenda, espectáculos e cursos creado polo ilusionista Kiko Pastur no 2020.
Museo de Historia Natural
Dinosauros, esqueletos, insectos xigantes, minerais… Un plan educativo e sorprendente que encantará a nenos e nenas de todas as idades e tamén a adultos curiosos. Situado no parque de Vista Alegre, o museo conta con exposicións interactivas e coleccións que inclúen fósiles prehistóricos ata especies autóctonas de flora e fauna.
Cidade da Cultura
Arquitectura futurista, exposicións interactivas e moito espazo para correr. É un lugar onde a cultura e o xogo van da man. Ademais, adoitan organizar obradoiros e actividades familiares nas fins de semana. E entre as súas exposicións temporais sempre atoparás unha opción xenial para nenos e nenas. Por exemplo, Orixes, que estará ata outubro e, polo tanto, coincidirá coa DrupalCamp. Trátase dunha experiencia sensorial inmersiva a través da realidade virtual, que percorre catro mil millóns de anos de evolución do noso planeta. Se tes entusiastas dos dinosauros na familia… van alucinar.
Nos arredores da Cidade da Cultura tamén está o parque da Balea, unha área de ocio infantil que homenaxea a un dos grandes artistas plásticos galegos: Urbano Lugrís.
Senda mitolóxica do monte Viso
O monte Viso, clave na planificación romana de Compostela, foi usado para labores agrícolas e industriais ata o século XX. Hoxe ofrece diferentes rutas, algunhas delas desde a Cidade da Cultura, e alberga unha senda mitolóxica poboada por representacións de diversos seres fabulosos da tradición oral galega, como a Lamia (mestura de muller e serpe), a Coca (un dragón), Breogán (rei dos celtas) ou os biosbardos (ves algunha vez un gamusino? Pois iso mesmo).
